KOCHA ZIDANE KUANZA KUISUKA REAL MADRID MPYA LEO

Loading...

Kocha mpya wa Real Madrid, Zinedine Zidane anaanza kazi leo, baada ya jana kutangazwa rasmi kuchukua mikoba ya Santiago Solari, aliyefukuzwa.

Zidane, anarejea Madrid, miezi 10 baada ya kuipa ubingwa wa Ulaya mara 3 mfululizo, akiwa na kibarua kigumu cha kurejesha makali ya timu hiyo, iliyoondolewa katika michuano ya klabu bingwa Ulaya na Ajax kwa kipingo cha aibu cha 4-1.

Katika ligi kuu ya Hispania "Laliga" Madrid kwa sasa iko katika nafasi ya tatu, iizidiwa pointi 12 na vinara wa ligi hiyo, Barcelona.

Zidane amepewa kandarasi ya miaka mitatu na nusu kuwanoa mabingwa hao wa kihistoria wa Ulaya, na mara baada ya kutambulishwa rasmi mbele ya wanahabari, Zidane,46, anasema ana furaha kurejea nyumbani.

"Nataka kuirejesha klabu hii pale ilipokuwa, ni ngumu sana kujua yanayoendelea ukiwa nje. Nimekuwa nikiishi Madrid, na kufanya mambo yangu hapa. Lakini sasa nimepata nguvu mpya, niko tayari kuiongoza klabu hii tena."

Zidane anakabiliwa na kibarua kigumu cha kuijenga tena Madrid, ambayo tangu iondokewe na nyota wake, Chritiano Ronaldo, aliyejiunga na Juventus msimu huu, imeshindwa kufanya vizuri.

Na Rashid Othmani.

Una maoni? Una habari ambayo ungependa tuichapishe? Tuma ujumbe kwa mhariri mkuu:dundiikaonline@gmail.com.