SAANANE YAANZA KAMPENI ZA UTALII WA NDANI

Loading...

Hifadhi ya Taifa ya Kisiwa cha Saanane haipo nyuma katika utekelezaji wa mikakati hiyo baada ya kuzindua kampeni maalumu ya siku kumi ya kuanzia Aprili Mosi hadi 10, kwa kutoa mafunzo ya uhifadhi na utalii wa ndani kwa wanafunzi wa taasisi za elimu ya juu jijini Mwanza.

Mhifadhi Mkuu wa Kisiwa cha Saanane, Abel Mtui anasema kampeni hiyo imelenga kuwafikia zaidi ya wanafunzi 5,000 kutoka vyuo vya Mtakatifu Augustine (Saut) Mwanza, Chuo cha Mipango, Chuo cha Biashara (CBE), Chuo cha Tiba Bugando (CUHAS) na Taasisi ya Uhasibu Tanzania (TIA).

Akizungumza ofisini kwake mwishoni mwa wiki iliyopita, Mtui amesema licha ya elimu kwa vitendo na kutembelea hifadhi, wanafunzi hao watapata fursa ya kubadilishana mawazo na uzoefu kuhusu masuala ya uhifadhi miongoni mwao na watumishi wa Tanapa.

Kisiwa cha Saanane ndiyo pekee kati ya hifadhi za Taifa 16 zilizopo nchini ipo katikati ya mji ukiwa na vivutio kadhaa, wakiwamo Simba jike na dume walioko kwenye banda maalumu, pundamilia wapole ambao wageni wanaweza kupiga nao picha kwa mtindo wa selfie, swala, nguchiro, tumbuli na aina mbalimbali za ndege wakiwamo tausi.

Pia, kuna mawe yaliyobebana na mengine kusimama yenyewe yenye urefu wa zaidi ya mita 20, maeneo ya kupumzikia na kupiga picha na mwamba mkubwa ambao mtu akiruka juu yake na kupigwa picha, huonekana kama anayepaa juu ya maji ya Ziwa Victoria.
Na Mohammed Makame.


Tuma neno 'HABARI' kwenda +255765112259 kupata habari za utalii punde zinapojiri.