MALKIA WA AFRIKA 'YVONNE CHAKA CHAKA' ATUA Z'BAR KWENYE TAMASHA LA ZIFF

Loading...

Malkia wa Muziki wa Afrika, Yvonne Chaka Chaka tayari yupo visiwani kwenye tamasha la 22 la Filamu la Kimataifa la Zanzibar (ZIFF) ambapo atafanya shughuli mbalimbali ikiwemo makongamano na wanawake pamoja na wadau wengine wakiwemo wasanii wa filamu na muziki. 

Kwa mujibu wa Mkurugenzi wa Masoko wa ZIFF, Isihaka Mlawa, Yvonne ni miongoni mwa wageni maalum wa mwaka huu ambapo pia atafanya shughuli za kijamii ikiwemo makongamano na warsha ya wanawake wasanii wa filamu na wale wa muziki.

“Mama Yvonne Chaka Chaka amefika jana Zanzibar na leo ataendelea na programu maalum ikiwemo kukutana na Wanafunzi wanaopata mafunzo ya filamu lakini pia atakutana na wasanii wa muziki kutoka Chuo cha Muziki cha Dhow Country Music Academy,” Alieleza Isihaka. 

Aidha, Mlawa aliongeza kuwa, wanatarajia Yvonne Chaka Chaka na mwanamuziki aliyeimba wimbo wa Zanzibar miaka 40 iliyopita, Sipho Mabuse kufanya tukio maalum la muziki kwenye shughuli za tamasha hilo linaloendelea visiwani na kutarajiwa kufikia tamati Julai 14, mwaka huu. 

Wasani hao wawili wapo visiwani kama wageni maalum waalikwa wa tamasha hilo kwa mwaka huu ambapo wamekuwa kioo na kielelezo kutokana na nyimbo zao mbalimbali zilizotamba Bara la Afrika pamoja na umaarufu wao katika jamii inayowazunguka. 

Msanii huyo (Jina la kuzaliwa Yvonne Machaka) alizaliwa mnamo mwaka 1965 na ni mwimbaji tajika kutoka Afrika Kusini. Jina lake malkia wa Afrika ni linatokana na kuwa mstari wa mbele katika muziki maarufu wa Afrika Kusini kwa miaka 20. 

Nyimbo kama I'm burning Up, I'm in Love with a DJ, I Cry for Freedom, Makoti, Motherland na Umqombothi (Pombe ya Afrika) zimeweza kumuweka kwenye ramani ya Afrika na kuwa maarufu zaidi. 

Msanii huyo alizaliwa Dobsonville huko Soweto na alikuwa mtoto wa kwanza wa Kiafrika kuonekana kwenye televisheni Afrika Kusini. Mwaka 1981 "Sugar Shack", kipindi cha wenye talanta, kilimjulisha kwa umma wa Afrika Kusini. 

Katika harakati za muziki, Chaka Chaka alianza kuimba akiwa na miaka 19 mwaka 1985 wakati Phil Hollis wa Dephon Records alimgundua mjini Johannesburg- Muda mfupi baada ya albamu yake "I'm in Love With a DJ", kuuzwa nakala 35,000. 

Pia katika nyimbo zake zilizowahi kushinda tuzo mbalimbali ni kama Burning Up, Sangoma, Who's The Boss, Motherland, Be Proud to be African, Thank You Mr DJ, Back on my Feet, Rhythm of Life, Who's got the Power, Bombani (Tiko Rahini), Power of Afrika, Yvonne and Friends na Kwenzenjani.

Na Neema Joshua.

.

.

Una maoni? Una habari ambayo ungependa tuichapishe? Tuma ujumbe kwa mhariri mkuu:dundiikaonline@gmail.com.